उदयपुर, २६ वैशाख । उदयपुरकाे चौदण्डीगढी नगरपालिकामा आगलागीबाट पाँच घर जलेर ध्वस्त भएका छन् । आइतबार चौदण्डीगढी नगरपालिका-८ वीरेन्द्र बजारमा भएको आगलागीबाट पाँच घर जलेर ध्वस्त भएको जिल्ला प्रहरी कार्यालय उदयपुरले जनाएको छ ।

आज बिहान अन्दाजी साढे तीन बजे विद्युत सर्ट भएर आगलागी भएको प्रहरीले जनाएको छ । स्थानीय कला राईको घरको मिटरमा सानो आगो सल्कँदै गरेको देखेको र आगो निभाउन पानी छ्याप्नासाथ उक्त पानीनै आगोझैँ भएर घर जल्न सुरु भएको प्रहरीले जनाएको छ।

कला राईको घरबाट सुरु भएको आगो अन्य ४ घरमा समेत पुगेको थियो । बिहानबाट लागेको आगो चौदण्डीगढी नगरपालिकाको दमकल, पानीको ट्र्यान्कर, स्थानीय बासिन्दा, नेपाल प्रहरी र सशस्त्र प्रहरीको सहयोगमा करिब दुई घण्टापछि मात्र नियन्त्रणमा लिइएको थियो ।

आगलागीबाट पद्माकुमारी मगर, कला राई, शिसिरकुमार राई, बादलबिक्रम राई र कृष्ण मगरको घर जलेर नष्ट भएको छ । बादल बिक्र राईको घरमा मुना राईको परिवार र कृष्ण मगरको घरमा भाडामा भुपाल राई बस्ने गरेको बताइएको छ ।

पाँच घरका ७ परिवारको लत्ताकपडा, गरगहना, अन्नपात, फर्निचर, टिभी, फ्रीजलगायतका सम्पूर्ण सामाग्री जलेर नष्ट हुँदा अन्दाजी १ करोड ३० लाखभन्दा माथिको क्षति भएको प्रहरीको प्रारम्भिक अनुमान रहेको छ ।