विराटनगर । विराटनगर – ३ मा रहेको सत्यनारायण मन्दिरको जग्गामा भूमाफियाको आँखा लागेको छ । जमिनदार शितलु राजवंशीले सत्यनारायण मन्दिरको नाममा खरिदबिक्रि हुन नमिल्ने गरि २०३० सालमा मन्दिरलाई जग्गा प्रदान गरेका थिए । सत्यनारायण मन्दिरको नाममा रहेको निजी गुठीलाई पछि आएर बल्लभ प्रसाद अधिकारीले आफ्नो अध्यक्षतामा दर्ता गरे । जग्गा र मन्दिरको संरक्षण गर्दै आएका शितलुका आफन्त सबैलाई हटाएर अधिकारी गुठीको अध्यक्ष बने । त्यसपश्चात् निजी गुठीको जग्गा बाडिँन थालेको रहस्य बाहिरिएको छ । अहिले उक्त जग्गामा महानगरपालिका लगाययत भुमाफियाको नजर समेत पर्न थालेको छ .।
सत्यनारायण मन्दिरको नाममा रहेको ७ बिघा १० कट्ठा १७ धुर जग्गा विभिन्न बहानामा संस्था र व्यक्तिलाई लिजमा दिन थालिएको छ । उक्त जग्गामा लायन्स क्बल, माओबादीको पार्टी कार्यालय साथै पोखरिया स्कुलको भवन बनाउन दिइएको छ ।
मन्दिरका अध्यक्ष बल्लभ प्रसाद अधिकारीको मिलेमत्तोमा गुठीको जग्गामा घर बनाएर भाडामा लगाएको पाइएको छ । यतिमात्र हैन प्रदेश १ का आर्थिक मामिला मन्त्री इन्द्र बहादुर आङ्वो समेत गुठीको जग्गामा रहेको भवनमा बस्दै आएका छन् ।
मन्दिरको नाममा रहेको ३९ख० को २२४ नम्बर कित्ताको १ बिघा जग्गा बाल सुधार गृह सञ्चालनका लागि जिल्ला प्रशासन कार्यालय मोरङलाई दिएको छ । २०६३ भदौ १७ मा सत्यनारायण मन्दिरका संरक्षक तथा अध्यक्ष गणेशी राजवंशी र जिल्ला प्रशासन कार्यालय मोरङका तत्कालीन प्रमुख मोदराज डोटेलबीच उक्त जग्गा बाल सुधार गृह स्थापनाका लागि हकभोग गर्न दिने सम्झौता भएको थियो ।
उक्त सम्झौता पत्रको ३ नम्बर बुँदामा ५ बर्षभित्र बाल सुधार गृह सञ्चालन नभए मन्दिरकै हकभोग कायम हुने उल्लेख छ । बाल सुधार गृह सञ्चालनकालागि मन्दिरसँग लिएको जग्गामध्ये केही जग्गामा महिला तथा बालबालिका कार्यालयको भवन निर्माण गरेर सञ्चालन गर्दै आएको थियो तर उक्त कार्यालय संघीयता कार्यान्वयनसँगै खारेज भइसकेको छ । कार्यालय खारेज भएसँगै घर र जग्गासमेत मन्दिरको हक भोगमा आउनुपर्ने हो । तर अहिले प्रदेश १ सरकारको आर्थिक मामिला तथा योजना मन्त्री इन्द्रबहादुर आङ्बो अवैध रूपमा बसोबास गरिरहेका छन् ।
मन्दिरका अध्यक्ष अधिकारीले विभिन्न निकाय र ब्यक्तिलाई निजी गुठीको जग्गा ९९ वर्षका लागि लिजमा दिएको पाइएको छ । अहिले उक्त जग्गामा पोखरीया माविको भवन निर्माण भइरहेको छ । भवनको शिलान्यासको क्रममा राजवंशीहरूले विरोध पनि गरेका थिए । तर बल प्रयोग गरेर आफुहरुलाई हटाएको गिता राजवंशीले बताइन् । निजी गुठीको जग्गा विभिन्न बहानाममा हस्तक्षेप भइरहेको उनको गुनासो छ । मन्दिरको नाममा रहेको दुई अर्बभन्दा बढी मूल्यको जग्गामा महानगरले समेत आँखा लगाएको उनले बताइन् ।
महानगरले कित्ता नम्बर ३९ख० २२६ को २ बिघा ३ कट्ठा ४ धुर र कित्ता नम्बर ३ ९ख० २१८३ कै १ बिघा ५ कट्ठा १३ धुर जग्गा ९९ वर्षका लागि लिजमा लिएको पाइएको छ । महानगरले यसैैबाट २ बिघा जग्गा उद्योग संगठनलाई समेत ९९ वर्षका लागि लिजमा दिएको छ । निजी गुठिको जग्गामा राजनीति चलिरहँदा समेत बोल्न डराउनुपर्ने अवस्था रहेको गीता राजवंशीकी छोरी वर्षाले बताइन् । मन्दिरका अध्यक्ष अधिकारीको योजनामा विभिन्न व्यक्तिलाई ९९ वर्षको लागि भन्दै जग्गा लिजमा बाडिँएको उनले बताइन ।
उक्त जग्गा अहिले ५२ जना व्यक्तिको नाममा ९९ वर्षका लागि लिजमा दिएको पाइएको छ ।
Post Views: 27