कटवाल दीपक
विराटनगर, २२ फागुन । चिया पसल खोलेर मनग्ये आम्दानी होला भनेर बिरलैले सोचेका हुन्छन् । अझ युवा उमेरमा विदेश गएर पैसा कमाउने आशा सबैमा हुन्छ । तर लामो समय अस्ट्रेलिया बसेर आफ्नै देशमा केही गर्नुपर्छ भन्ने उद्देश्यले नेपाल फर्किएका युवा दुर्गेश घिमिरे एउटा उदाहरणीय व्यक्ति बनेका छन् । उनले विराटनगरमा ‘दाज्जुको चिया पसल’ खोलेर आफ्नो पृथकता प्रस्तुत गरेका छन् ।
दुई वर्षअघि विराटनगर–२ मा २१ लाखको लगानी गरेर दाज्जुको चिया पसल खोलेका उनी एक सफल ब्यापारी मात्रै होइन पृथक व्यवसायबाट राम्रो आम्दानी गर्ने युवा मानिन्छन् । त्यतिमात्र होइन चिया पसलमा उनले १३ युवाहरूलाई पनि रोजगार दिएका छन् । उनले सरकारी मापदण्डअनुसार स्टाफलाई तलब सुविधा दिएका छन् ।
‘नेपालमै केही गर्छु भनेर अस्ट्रेलियाबाट फर्केको थिएँ’, उनले भने, ‘सबैले थाहा पाएको र नेपालीले रुचाउने चिया बेच्न फरक तरिकाले चिया पसल गर्न थालेको हुँ । अहिले व्यापारिक हिसाबले राम्रो छ ।’ ‘दाज्जुको चिया पसल’ भन्ने नाम कसरी आयो भन्ने प्रश्नमा उनी भन्छन्, ‘सबैलाई आदर गर्ने शब्द भएकाले मैले दाज्जु नामाकरण गरेको हो ।’
सुरुमा चिया पसल खोल्छु भन्दा परिवार पनि अकमक्क परेको सुनाउँदै उनले नाम दर्ता गर्न जाँदा पनि कसैले नपत्याएको सुनाए । उनको परिवार हाल अस्ट्रेलियामै छन् । तर उनी त्यहाँबाट नेपालमै केही गरौँ भन्ने आकंक्षाका साथ स्वदेश फर्किएका हुन् । उनी भन्छन्, ‘चिया पसल खोल्छु भन्दा परिवार अचम्ममा परे । फेरि खोलिसकेर नाम दर्ता गर्न जाँदा विराटनगरमा घर भएको मान्छेले पनि चिया पसल खोल्छन् भने प्रश्न गरे । कसैले पत्यानन् पनि । यसैले दर्ता गर्न पनि समय लाग्यो ।’
अब उक्त पसलको शाखा खोल्ने तयारी घिमिरेको छ । इटहरीको भोजपुरे टोलमा शाखा खोल्ने तयारी रहेको उनले बताए । त्यसबाहेक इटहरी र झापामा पनि शाखा विस्तार गर्ने तयारी रहेको उनको छ । अहिले विराटनगरमै पनि धेरै चिया पसलहरू दाज्जुकै चिया पसलको सिको गरेर खुलेको उनको जिकिर छ ।
विभिन्न १९ प्रकारका चिया
दाज्जुको चिया पसलमा विभिन्न १९ प्रकार चिया पाइन्छ । यसैले पनि उक्त पसल युवाहरूको आकर्षकको थलो बनेको छ । चियाका साथमा चुरोट पाउने भएका कारण पनि दाज्जुको चिया पसल युवाहरूको पहिलो रोजाइको थलो बनेको हो । चिया र चुरोटबाहेक उनको पसलमा पिज्जा पनि पाइन्छ ।
उनको पसलमा मासिक चार लाख ५० हजारसम्म खर्च हुन्छ । तर आम्दानी पनि राम्रो रहेको उनी बताउँछन् । आफ्नै लगानीमा चिया पसल खोलेर पृथकता प्रस्तुत गरेका उनी आफूले भारतको चिया गल्ली भन्ने ठाउँमा भएको चिया पसलबाट प्रेरणा पाएको उल्लेख गर्छन् ।
उनी भन्छन्, ‘इन्डियाको चिया गल्ली भन्ने ठाउँमा भएको चिया पसललाई देखेर चिया फरक तरिकाले पनि गाग्रहकलाई सर्भिस गर्न सकिँदो रहेछ भन्ने कुरा सिकेँ । यसबाट म धेरै नै प्रभावित भएको थिएँ ।’
आम्दानीबाट केही रकम समाजसेवामा
उनले पसलबाट भएको आम्दानीमध्ये केही रकम समाजसेवाका लागि छुट्याउने गर्छन् । सडकमा भएका घाइते कुकुरको उपचारमा र कुकुरको बन्ध्याकरण गर्न उनले सहयोग गर्छन् । उनी भन्छन्,‘मैले आम्दानीमध्येको केही रकमचाहिँ सडकमा घाइते अवस्थामा रहेको कुकुरको उपचारमा खर्चिने गरेको छु । त्यसबाहेक कुकुरको बन्ध्याकरण गर्न पनि सहयोग गर्नेगरेको छु ।’
Post Views: 3