विराटनगर । विराटनगरमा कोठा भाडामा लिएर बसेका एक व्यक्तिले भाडाबापतको रकम माग्दा समूहमा आएर घरधनीलाई दुर्व्यवहार, उनका छेरालाई कुटपिट तथा घरधनीले सञ्चालन गरेको मेटेरियल पसलमा तोडफोड गरेको आरोपमा प्रहरीमा उजुरी परेको छ ।
विराटनगर महानगरपालिका-६, ग्यासमार्ग, सरौचिया टोलस्थित घरधनी मोहम्मद तोफिक तथा उनका श्रीमती र छोरा मोहम्मद तोशिफलाई कुटपिट र तोशिफले सञ्चालन गरेको पसलमा तोडफोड गरेको आरोपमा घरधनी तोफिकको घरमा कोठा भाडामा लिएर बसेका मोहम्मद मिनाहाजसहितको समूहविरूद्ध प्रहरीमा उजुरी परेको हो ।
तोशिफले आफू र आफ्ना बुवा तोफिक तथा आमालाई अपशब्द प्रयोग गर्दै गालीगलौज र आफूलाई कुटपिट गरेको आरोपमा घटनामा संलग्न समूहविरूद्ध शुक्रबार प्रहरी चौकी बखरीमा उजुरी दिएका हुन् ।
तोशिफका अनुसार उनका बुवा तोफिकले गत माघमा सरौचिया टोलमा एक घर खरिद गरेका थिए । घर खरिद गरेअघिदेखि नै मिनाहाज उक्त घरको एक कोठा भाडामा लिएर बस्दै आएका थिए ।
तोफिकले घर खरिद गरेपछि मिनाहाजलाई दुई महिनाभित्र कोठा खाली गरिदिन भनेका थिए । मिनाहाजले फागुन २६ गते कोठा खाली गरेर घरबहालबापतको रकम चैत १ गते दिने मौखिक सहमति गरेका थिए ।
बाटा रोडमा ट्रेलर पसल सञ्चालन गर्दै आएका मिनाहाजसँग पूर्वशर्तअनुसार तोशिफले शुक्रबार दिउँसो ४ बजे बाटा रोडस्थित उनको पसलमा गएर कोठा भाडाबापतको रकम मागेका थिए । तर, मिनाहाजले भाडाबापतको रकम नदिने भन्दै धाकधम्की दिएका थिए ।
सोपश्चात् तोशिफले मिनाहाजको पसलबाट ३ थान बिलप्याड जफत गरी साथमा लिएर फर्किएका थिए । त्यसको केही बेरमा मिनाहाजले उनका छोरा र परिवारका अन्य सदस्यसहित ४/५ जनाको समूह लिएर तोशिफकाे घरमा सञ्चालित मेटेरियल पसलमा आएका थिए ।
त्यहाँ आएपछि सो समूहले अपशब्द प्रयोग गर्दै आफूसँगै आमाबुवालाई गालीगलौज तथा आफूलाई कुटपिट र पसलमा तोडफोड गरेको आरोपमा तोशिफले मिनाहाजलाई कारबाहीको माग गर्दै प्रहरीमा उजुरी दिएका हुन् । सो क्रममा पसलको गल्लामा रेहेको केही रकमसमेत हराएको तोशिफले बताएका छन् ।
तोशिफले हराएको रकम असुलउपर गर्नुपर्ने, पसल तोडफोडका क्रममा भएको क्षतिपूर्ति दिनुपर्ने र दोषीलाई कारबाही गर्नुपर्ने माग गर्दै प्रहरीमा उजुरी दिएका हुन् ।
Post Views: 67