विराटनगर । मोरङको कटहरी गाउँपालिकाका अध्यक्ष देवराज चौधरीलाई उनी निर्वाचित दल नेपाली कांग्रेसले नै कारबाहीको माग गरेको छ ।

पार्टी संगठन तथा नेता-कार्यकर्तालाई बेवास्ता, काममा असहयोग, अन्य पार्टी र कर्मचारीसँग साठगाँठ, विकास निर्माण र ठेक्कामा अनियमितता, कर्मचारी नियुक्ति तथा सरूवामा मनपरी गरेको भन्दै उनलाई कारबाहीको माग उठेको हो ।

उनको कार्यशैलीप्रति रूष्ट हुँदै पार्टीका क्षेत्रीय र प्रदेश प्रतिनिधि, पालिका सभापतिसहितका पदाधिकारी, सातवटै वडाका सभापतिसहित शनिबार बसेको संयुक्त बैठकले अध्यक्ष चौधरीलाई पार्टीको माथिल्लो निकायमा कारबाहीका लागि सिफारिस गर्ने निर्णय गरेको हो । अध्यक्ष चौधरीलाई कारबाही नगरिए पार्टीका पालिकास्तरका नेताहरू सामूहिक राजीनामा दिन बाध्य हुने चेतावनीसमेत दिइएको छ ।

पार्टीका नेता-कार्यकर्ताले विकास र जनताका माग लिएर जाँदा त्यसको सुनुवाइ नगरी ‘मैले कांग्रेसको मतले जितेको होइन, अरू पार्टीको मतले जितेको हुँ । जहाँ जानुहुन्छ जानुस्’ भन्ने खालका अभिव्यक्ति दिने गरेको आरोप अध्यक्ष चौधरीलाई लगाइएको छ ।

हुलाकी सडकमा संघर्ष समिति र जिल्ला प्रशासन कार्यालयसँगको सम्झौताअनुसार काम नभएर दुर्घटना भइरहेको, सडक छेउका बासिन्दाहरूलाई धुलोले असर परिरहेको जनाउँदै पुनः जिल्ला प्रशासन कार्यालयमा ज्ञापनपत्र बुझाएर त्यसविरूद्ध चरणबद्ध आन्दोलन गर्ने निर्णय बैठकले गरेको छ ।

पार्टीका पालिका उपसभापति गोकर्ण भट्टराईसँग भ्रमणका लागि भन्दै आर्थिक सहयोग माग गरेको र रकम नदिएकाले कटहरीका कर्मचारी रहेका भट्टराईका भाइ राजेश भट्टराईको जागिर खाइदिने धम्की दिएर सरूवा गरी दुःख दिएको आरोप अध्यक्ष चौधरीमाथि लगाइएको छ ।

यस्तै पूर्वाग्रह राखेर पालिकाकी कर्मचारी रहेकी पार्टीका पालिका सभापति तथा गाउँपालिकाका पूर्वअध्यक्ष रामकुमार कामतकी छोरी सरिता कामतको सरूवा गरेको, पार्टीका वडा सभापति सञ्जय मण्डलको काममा अवरोध गरेको आरोप अध्यक्ष चौधरीमाथि छ ।

पार्टीका प्रदेश प्रतिनिधि गणेश मुखियाको ट्र्याक्टर नियन्त्रणमा लिएर दैनिक ५ हजार रूपैयाँ क्षति पुर्‍याइरहेको, हुलाकी सडकमा भएको दुर्घटनाको विरोधमा उत्रिएका ११ जनालाई अभद्र व्यवहारको मुद्दा चलाएको पनि आरोप लगाइएको छ ।

त्यसैगरी अंग्रेजी माध्यमको शिक्षाका लागि नियुक्त शिक्षक हटाएको, प्रमुख प्रशासकीय अधिकृत मनोज साहसँग मिलेर आर्थिक चलखेल गरेको, हुलाकी सडक र रेलवेमा हटिया लगाएर अवैध रकम उठाउने गरेको आरोप लगाइएको छ ।

वार्षिक ४० लाख रूपैयाँमा ठेक्का लाग्ने गरेको हटिया हटाउन चौधरीले नेपाल प्रहरी र सशस्त्र प्रहरी परिचालन गरेर दमन गराएको आरोप लगाइएको छ । बैठकले अध्यक्ष चौधरीका अनियमित कार्यविरूद्ध अख्तियार दुरूपयोग अनुसन्धान आयोगमा उजुरी दिनेसमेत निर्णय गरेको छ ।

बैठकमा नेपाली कांग्रेस, मोरङका कार्यवाहक सभापति भक्ति माझी, क्षेत्रीय सभापति विनोद बस्नेत, जिल्ला सदस्य गोपाल साहलगायत नेताहरूको उपस्थिति थियो ।