विराटनगर । विराटनगरमा स्टाफ नर्सको हत्या गरेका प्रेमीले आत्महत्या गरेका छन् । नोबेल मेडिकल कलेजमा कार्यरत स्टाफ नर्स २३ वर्षीया चन्द्रिकाकुमारी दासको हत्या गरेका उनका प्रेमी २२ वर्षीय शिवशंकर दासले आत्महत्या गरेका हन् ।
नोबेल मेडिकल कलेज अगाडि रहेको होटेल फाइनको कोठा नं. १०२ मा आइतबार राति झुन्डिएको अवस्थामा उनको शव भेटिएको जिल्ला प्रहरी कार्यालय, मोरङका प्रवक्ता प्रहरी नायब उपरीक्षक (डीएसपी) रञ्जनकुमार दाहालले जानकारी दिए ।
उनका अनुसार हत्या गरेर फरार शिवशंकर विराटनगरमै रहेको सूचनापछि उनको खोजीका लागि एकसाथ ४०० प्रहरी परिचालन गरी विराटनगरका होटलहरूमा ‘सर्च अपरेशन’ चलाइएको थियो ।
शवको प्रकृति र स्वास्थ्य परीक्षण रिपोर्टका आधारमा शिवशंकरले आत्महत्या नै गरेको पुष्टि भएको र अहिले उनको शव कोशी अस्पतालमा राखिएको डीएसपी दाहालले बताए ।
सिरहाको फुल्काहकट्टी नगरपालिका घर भएकी स्टाफ नर्स चन्द्रिकाको शुक्रबार दिउँसो उनी डेरा बस्ने विरानगरपालिका–४, बुढाथोकी मार्गस्थित धीरेन्द्र गिरीको घरको कोठाभित्रको शौचालयमा शव भेटिएको थियो ।
धारिलो हतियार प्रहार गरी वीभत्स हत्या गरेको अवस्थामा उनको शव भेटिएको थियो । प्रहरीका अनुसार उनी केही महिनाअघिदेखि त्यहाँ डेरा बस्दै आएकी थिइन् ।
चन्द्रिकाका प्रेमी शिवशंकर वैदेशिक रोजगारीका लागि मलेसियामा थिए । उनी २६ फागुनमा काठमाडौं आएका थिए । काठमाडौंबाट उनी सिरहास्थित आफ्नो घर नगई २९ फागुनमा विराटनगर आए । उनी केही दिन चन्द्रिकाको कोठामा बसे । त्यहाँ चन्द्रिका र शिवशंकरबीच विवाद पनि भएको थियो ।
बिहीबार दिउँसो चन्द्रिकाको हत्या गरेर शिवशंकरले त्यसको फोटो खिचे । त्यसपछि आफ्नो सुटकेश लिएर कोठाबाट निस्किएका शिवशंकर चन्द्रिका भारतको जोगबनी गएको भन्दै कोठाको चाबी छेउको अर्को कोठामा बस्ने चन्द्रिकाकी साथीलाई दिए । उनले चन्द्रिकाकी ती साथीको फोन नम्बर पनि लिए । तर, चन्द्रिका राति अबेरसम्म पनि फर्किइनन् ।
शुक्रबार दिउँसो चन्द्रिकाकी साथीको ह्वाट्सएप नम्बरमा नयाँ नम्बरबाट चन्द्रिकाको हत्या गरिदिएको भन्दै रगतले लतपतिएको शवको फोटो आयो । चन्द्रिकाकी साथीले घरबेटीलाई खबर गरेपछि घरबेटीले प्रहरीलाई खबर गरे ।
प्रहरीका अनुसार हृवाट्सएपमा म्यासेज गर्ने नम्बरमा अमिन धानुक नाम लेखिएको थियो । धानुक पनि चन्द्रिकाका प्रेमी हुन् । उनी चन्द्रिकाका पछिल्लो प्रेमी भएको खुलेको छ ।
नम्बरमा धानुकको नाम देखिएपछि प्रहरी अनुसन्धान उतैतिर मोडिएको थियो । तर, प्रहरीले अनुसन्धान गर्दै जाँदा सो नम्बर रहेको सिम धानुकको नभई शिवशंकरको नाममा दर्ता रहेको खुल्यो । घटनालाई डाइभर्ट गर्न शिवशंकरले योजनाअनुसार नै धानुकलाई मुछ्न खोजेको देखिएको डीएसपी दाहालले बताए ।
शिवशंकर र चन्द्रिकाबीच केही वर्षअघिदेखि प्रेम सम्बन्ध रहेको देखिन्छ । तर, शिवशंकरले चन्द्रिकाले धोका दिएको भन्दै उनको हत्या गरेको देखिएको प्रहरीको भनाइ छ ।
‘प्रेम सम्बन्धमा आएको दरारपछि घटना घटेको पाइयो । चन्द्रिकाको दुईतिरको प्रेमले सम्बन्धमा दरार ल्याएको देखिन्छ,’ डीएसपी दाहालले राष्ट्रिय डेलीसँग भने ।
Post Views: 48