विराटनगर । थारू कल्याणकारी सभा मोरङको १० औं जिल्ला अधिवेशन सम्पन्न भएको छ । बुधबार बूढीगंगा–२ स्थित थारू संग्राहलय भवन बौराहामा अधिवेशन सम्पन्न भएको हो ।
निर्वाचनका लागि बारम्बार मिति सारिएको भए पनि ७ चैतमा निर्वाचन गर्न निर्वाचन अधिकृत जयराम पंजियारले सार्वजनिक सूचना प्रकाशित गरेका थिए । तर, सभाको मोरङ अध्यक्ष उम्मेदवार प्रदिपकुमार भगत थारूले एक पक्षीय ढंगबाट अमुक समूहलाई फाइदा पुर्याउने गरी संचालन गरिने निर्वाचन आफूलाई मान्य नहुनेभन्दै बंहिष्कार गरेका थिए ।
थारूले सभाको केन्द्रिय कार्य संचालन समितिको बैठकबाट अधिवेशनको निर्वाचन प्रक्रिया स्थगित गर्न र आफूलाई कार्यसमिति मोरङको जिल्ला अध्यक्ष तोकिएको अवस्थामा बलजफ्ती निर्वाचन गराउन खोज्नु विधान सम्मत नभएको बताएका थिए । उनले सभाको केन्द्रिय कार्यालयबाट प्राप्त पत्र निर्वाचन स्थलमा पनि टाँस गरिएको दावी गरेका थिए ।
तर, निर्वाचन अधिकृत पंजियारले केन्द्रबाट पत्र आएको भन्ने कुरा हाँस्यास्पद रहेको बताए । उनले भने, ‘त्यस्तो पत्र त आफूले पनि पाउनु पर्ने थियो । तर मैले त प्राप्त गरेको छैन ।’
उनले उच्च र जिल्ला अदालतको आदेश साथै प्रशासनको सहमतिमा निर्वाचन गराएको बताए । उनले आफू कुनै समूहको नभएको र निष्पक्ष निर्वाचन गर्न लागिपरेको बताए ।
उनले निर्वाचन सहज परिस्थितिमा र विवाद रहित वातावरणमा सम्पन्न भएको बताए । उनले कुनै एक व्यक्तिले बहिष्कार गर्दैमा निर्वाचन नविथोलिने र निर्वाचनबाट विजयी उम्मेदवारले नै वैधानिकता पाउने उल्लेख गरे ।
अध्यक्षका अर्का दावेदार प्रदीपकुमार विश्वासले समग्रमा मोरङका थारू मतदाताहरू परिवर्तनको पक्षमा रहेको बताए । उनीहरूको नेतृत्व फेर्नु पर्छ भन्ने चाहना प्रवल भएको हुनाले निर्वाचन संचालन गरिएको स्पष्ट पारे । उनले निर्वाचन बिनाकुनै कारण ६÷६ पटक रोकिएको उल्लेख गर्दै मतदाता पनि आजित भएको र मतदाता कै आग्रह अनुसार निर्वाचन गरिएको बताए ।
लेटाङकी मतदाता मञ्जु चौधरीले आफूलाई विवाद बारे थाह नभएको बताइन् । उनले जसले जिते पनि थारूको हक, हित र कल्याणका लागि इमान्दारितापूर्वक काम गर्नु पर्ने बताइन् । एक अध्यक्ष, तीन उपाध्यक्ष, एक सचिव, एक सह–सचिव, एक कोषध्यक्ष र १४ सदस्यका लागि निर्वाचन भएको थियो । मतदान सकिएपनि मतगणनाको अन्तिम नतिजा आउन भने बाँकी छ ।
Post Views: 129