विराटनगर । काठमाडौँबाट गोरखातर्फ जाँदै गरेको ट्याक्सी त्रिशूलीमा नदीमा खस्दा पाँच जनाको मृत्यु भएको छ ।
दुर्घटनामा दुई पुरूष, दुई महिला र एक बालकको मृत्यु भएको जिल्ला प्रहरी कार्यालय, चितवनले जनाएको छ । दुर्घटनापछि एक जना बेपत्ता छन् ।
आज बिहान ७:१५ बजे चितवनको इच्छाकामना गाउँपालिका-५ स्थित पृथ्वी राजमार्गको सिमलधारा नजिक बा २ ज ४१९६ नम्बरको ट्याक्सी त्रिशूली नदीमा खसेको हो ।
दुर्घटनामा ट्याक्सी चालक गोर्खा नगरपालिका–७ का ३५ वर्षीय अर्जुन सिर्मल, सोही ठाउँका ४१ वर्षीया हरिमाया रोकाय, ७० वर्षीया जूनकिरी रोकाय, २८ वर्षीया अञ्जना रोकाय, नौ वर्षीय बालक आगमन नगरकोटीको मृत्यु भएको हो । अठार वर्षीय दिवस रोकाय बेपत्ता छन् ।
चितवनका प्रहरी प्रमुख भावेश रिमालले पारिवारिक कार्यक्रम सकेर काठमाडौँबाट तीनवटा गाडीमा फर्किँदै गर्दा दुर्घटना भएको बताए ।
अन्य दुई गाडी मुग्लिन पुगेर धेरैबेर कुर्दा पनि एक गाडी नआएपछि उनीहरूले प्रहरीलाई खबर गरेको रिमालले जानकारी दिए । खोज्दै जाँदा सडकको डिभाइडर भाँचिएको देखेपछि त्रिशूलीमा झरेर हेर्दा ट्याक्सी खसेको भेटिएको उनले बताए ।
Post Views: 4