विराटनगर । विराटनगरकी २७ वर्षीया वर्षा सुवेदी गत चैत २४ गते झुण्डिएको अवस्थामा फेला परिन् । झुण्डिएको अवस्थामा फेला परेपनि शंकास्पद देखिएको छ ।

श्रीमान र परिवारको मानसिक यातनाले आत्महत्या गरेको भन्दै माइती पक्षले चार जनाविरुद्ध आत्महत्या दुरुत्साहनको जाहेरी दिएका छन् ।

वर्षाकी आमा रञ्जु सुवेदीले जिल्ला प्रहरी कार्यालय मोरङमा वर्षाका श्रीमान, ससुरा, सासू र नन्दविरुद्ध जाहेरी दिएकी हुन् ।

श्रीमान सुजनले वर्षालाई निरन्तर शारीरिक र मानसिक यातना दिएको उजुरीमा उल्लेख छ । वर्षाको अनुहार तथा शरीरमा चोटपटक र निलडाम भएको तस्वीरहरुसमेत जाहेरीमा संलग्न राखिएको छ ।

अमेरिकामा बस्दै आएका सासू–ससुरा घर आएको राति नै वर्षाले आत्महत्या गरेकी हुन् । श्रीमानले शारीरिक र मानसिक यातना दिने गरेको छेरीले सुनाएको भएपनि सामान्व विवाद भनेर आफूहले पनि वास्ता नगर्दा घटना भएको माइती पक्षको भनाई छ ।

बाबुआमा अमेरिकाबाट फर्किएपछि सुजनले गरेको व्यवहारबारे छलफल गर्ने माइती पक्षको तयारी रहेकोमा वर्षाको शव भेटिएको रञ्जुको भनाइ छ । छोरालाई लिएर सुत्ने वर्षासँग घटना भएको राति नन्द सुजाता सुतेको पाइएको छ ।

छोरालाई अर्कै कोठामा सुताएर आँफू वर्षाको साथमा रहेको र राति साढे ११ बजेसम्म कुराकानी गरेको सुजताले प्रहरीसामु बताएकी छन् ।

पति सुजनले चैत २४ बिहान साढे ८ बजेसम्म ढोका नखुलेपछि आफूले लात्तीले हानेर ढोका फुटाएको बताएका छन् । तर, बन्द रहेको भनिएको ढोकाभित्रको चुकुल जस्ताको त्यस्तै अवस्थामा रहनुलाई माइती पक्षले शंकास्पद रहेको बताएका छन् ।

मोरङका प्रहरी प्रमुख एसपी दीपक पोखरेलका अनुसार खाना पकाउने एलपी ग्यासको सिलिण्डरमाथि सिरानी राखेर पंखामा झुन्डिएको अवस्थामा वर्षाको शव भेटिएको थियो । सिलिण्डर भूईंमा लडेको भएपनि कोठामै सुतिरहेकी सुजाताले कुनै आवाज नसुनेको बताएकी छन् ।

प्रहरीले जाहेरी गरिएका व्यक्तिलाई उपस्थित गराई बयान लिएको र घटनाका बारेमा थप अनुसन्धान भइरहेको एसपी पोखरेलले बताए । २०७१ साल असोजमा सुजनसँग वर्षाको प्रेमविवाह भएको थियो ।

२०७२ सालसम्म सहज सम्वन्ध रहेपनि केही वर्ष अघिदेखि उनीहरु भिन्न कोठामा बस्दै आएको बताइएको छ । घटनाबारे थप अनुसन्धान भइरहेको प्रहरीले जनाएको छ ।