भेषराज पोखरेल
नेपाली राजनीतिको विडम्बना नै हो केवल राज्यकोषको ब्रह्मलुटका लागि पार्टीहरूमा गुट र फुटको अवस्था देखिनु। सिद्धान्त र कार्ययोजनालाई रद्दीको टोकरीमा हालेर आफ्नो वर्चस्वका खातिर जुनसुकै हतकण्डा अपाउन पछि नपर्ने बाहरू र त्यसैको सिको गरेर आफू स्थापित हुन खोज्ने युवाहरूको नग्न नृत्य मात्रै हो हाम्रो लोकतान्त्रिक अभ्यास। न कार्ययोजना, न दूरदर्शिता, न त कुनै रोडम्याप भएका अवसरवादी झुन्डहरूको अखडा जस्तै देखिने राजनीतिक पार्टीहरूले जनतामा थप नैराश्य सिवाय केही देलान् भन्ने सोच्नु गोरु ब्याएपछि बिगौती खान्छु भन्ने ख्वाब मात्रै हो।
के बुढा के युवा सबैलाई करोडौं कमाए मात्रै राजनीतिमा स्थायित्व प्राप्त गर्न सकिन्छ भन्ने कुसंस्कारले ग्रस्त बनाएको आजको अवस्थामा युवाहरूको हातमा नेतृत्व आइ हाले पनि हात्ती आयो हात्ती आयो फुस्सा सिवाय केही हुने देखिन्न। देश अहिले भ्रष्टाचारको चरमोत्कर्षमा पुगेको छ। नूनदेखि सुनसम्म, मलदेखि ढलसम्म अनि रासनदेखि आसनसम्म कमिसनको मात्रै कुरा हुनु सबैका लागि स्वाभाविक बन्न थालेको छ। मन्त्री भएर पनि काठमाडौमा घरघडेरी जोड्न र करोड बढीको गाडी चढ्न नसक्नेलाई हाम्रो समाजले नालायक, कायर अनि नामर्द नै बनाइदिँने गर्छ। सरकारी जागिर खाएर पनि घुस खान नसक्नेले समाजमा अपमान सिवाय केही पाउँदैन। न्यायलयको उच्च ओहदामा पुगेका अधिकांश व्यक्तिको सम्पत्ति खोज्ने हो भने सत्तरी पुस्तासम्मलाई सुतिसुती खान पुग्ने कुरा सबैको जानकारीमा नभएको पक्कै होइन।
अस्वाभाविक जीवनशैलीलाई भ्रष्टाचार नमान्ने, अदालतले डामेपछि मात्रै भ्रष्टाचारी ठान्ने प्रवृत्ति हाम्रो सामाजिक यथार्थ हो। पाँच हजार घुस लिने निम्न वैतनिक कर्मचारीलाई जेल पठाएर पचास करोड लिनेलाई सफाइ दिने न्यायलय रहुन्जेल देश कदापि भ्रष्टाचार मुक्त हुन सक्दैन। भ्रष्टाचार हाम्रो दैनिकी हो, भ्रष्टाचार हाम्रो आदर्श हो, भ्रष्टाचार हाम्रो उद्देश्य हो अनि सामाजिक प्रतिष्ठा आर्जनको बलियो आधार हो। लाग्छ मुस्किलले पाँच प्रतिशत व्यक्तिहरू मात्रै कालो धनको विकारबाट मुक्त छन्। बहुसंख्यक मानिसहरू भ्रष्ट भएको मुलुकमा एकाध इमानदारले कि त ज्यान गुमाउनु पर्छ कि त आफूलाई पनि भ्रष्ट नै बनाउनुपर्छ।
यसर्थ जुनसुकै तन्त्र ल्याएपनि, नेतृत्वमा जोसुकै आएपनि भ्रष्टाचार व्याप्त रहुन्जेल लुट्ने मात्रै काम हुने छ। फरक यत्ति हो कि कसैले जनतालाई प्रत्यक्ष लुटेर देशलाई कंगाल बनाउँछन् भने कसैले नीतिगत तहबाटै देश लुटेर जनतालाई कंगाल बनाउँछन्।
Post Views: 2