विराटनगर ÷ सत्यम कृषि बहुउद्देश्यीय सहकारी संस्था लिमिटेडले स्वस्थ मासु उत्पादन गर्ने उद्देश्यसहित उन्नत जातको खसीबाख्रा पालन सुरु गर्ने भएको छ ।
सहकारीले नेपाल सरकार र विश्व बैंकको सहयोगमा बाख्रा पालन सुरु गर्न लागेको हो । बाख्रा पालनस्थल मोरङको ग्रामथान गाउँपालिका–१ लखन्तरीमा बिहीबार सार्वजनिक सुनुवाई कार्यक्रम गरिएको छ । सम्पूर्ण सेयर सदस्यलाई बाख्रापालनका विषयमा जानकारी दिन र जिज्ञासा समाधान गर्न सार्वजनिक सुनवाई गरिएको सहकारीका अध्यक्ष गंगाप्रसाद यादवले जानकारी दिए ।
उन्नत जातको खसीबोका र बाख्रा पालन गर्न सहकारीलाई कृषि तथा पशुपन्छी विकास मन्त्रालय र विश्व बैंकको नेपाल लाइभ स्टक सेक्टर इनोभेसन आयोजनाले लगानीको ५० प्रतिशत अनुदान दिने भएको छ । आयोजनाका लागि सहकारीले आफ्नो २० प्रतिशत लगानी गरेको छ । यस्तै ३० प्रतिशत राष्ट्रिय सहकारी बैंकबाट कर्जा लिएको छ भने लगानीको ५० प्रतिशत विश्वबैंकले बेहोर्ने सहकारीकी प्रबन्धक उषा कार्कीले बताइन् । सम्बन्धित निकायहरुसँग सम्झौता भइसकेर यतिखेर कार्यान्वयनको चरणमा रहेको कार्कीको भनाइ छ । बाख्रा पालनका निम्ति सहकारीले लखन्तरीमा १० कठ्ठा जग्गा खरिद गरेको छ भने बाख्राको आहाराका निम्ति डालेघाँस उत्पादन गर्न २ बिघा जग्गा भाडामा लिएको छ । १ सय ५० वटा बाख्रा र ४ वटा बोका पालन गरिने जनाइएको छ ।
स्वस्थ मासु उत्पादनका लागि बाख्रा पालन व्यवसाय तथा बजारीकरण कार्यक्रमबाट स्वस्थ मासु उत्पादन हुने मात्र नभई सेयर सदस्यका साथै स्थानीय किसानसमेत लाभान्वित हुने नेपाल सरकार तथा विश्व बैंकबाट सञ्चालित आयोजनाका समन्वय प्रमुख डा. सुधीरकुमार सिंहले बताए । आयोजनाले प्रदेश–१ का ७ जिल्लामा ५० वटा सहकारीसँग अनुदान सम्झौता गरेको सिंहले जानकारी गराए ।
Post Views: 3