विराटनगर । ‘बुद्ध वर्न इन नेपाल’ को च्यारिटी शो विराटनगरमा भइरहेको छ । अभिनेता रमित ढुंगानाद्वारा निर्मित तथा अभिनीत चलचित्र ‘बुद्ध वर्न इन नेपाल’ को आइतबारदेखि बिराटनगरमा च्यारिटी शो सुरु गरिएको हो ।
प्याब्सन विराटनगर, हिसान मोरङ र एन प्याब्सनको सहकार्यमा चलचित्रको ‘च्यारिटी शो’ गरिएको हो । चलचित्रका निर्माता तथा नायक ढुङ्गानाले चलचित्र सन्देशमुलक रहेको बताए ।
उनले चलचित्रमा बुद्ध नेपालमै जन्मिएका हुन भनेर देखाइएको बताए । देश तथा विदेशका अन्य स्थानमा समेत च्यारिटी शो गरिसकिएको यस चलचित्र पूर्वमा विराटनगरबाट सुरु गरिएको उनले बताए । च्यारिटी शो अन्र्तगत विराटनगरका विभिन्न स्कुल तथा कलेजका विद्यार्थीले चलचित्र हेरेका छन् ।
यो चलचित्र विद्यार्थीहरूले हेर्नै पर्ने चलचित्र रहेको प्याब्सनका सचिव अशोक लामाले बताए । चलचित्र हेर्न बाँकी स्कुल तथा कलेजका विद्यार्थीलाई पनि च्यारिटी शोमा सहभागिता जनाउन उनले आग्रह समेत गरेका छन् । उनले विराटनगरका ३० देखि ३५ वटा विद्यालयले सो चलचित्र हेर्ने बताए ।
चलचित्र हेरेका विद्यार्थीहरूले पनि राम्रो प्रतिक्रिया दिँदै अन्य विद्यालयका विद्यार्थीलाई पनि हेर्न आह्वान गरेका छन् । विराटनगरका करिब १५ हजार विद्यार्थीलाई यो चलचित्र देखाउने योजनाका साथ शो भइरहेको बताइएको छ ।
ज्ञानेन्द्र देउजाले निर्देशन गरेको चलचित्रमा रमित ढुङ्गाना, अमित ढुङ्गाना, नीर शाह, मिथिला शर्मा लगायत विदेशी कलाकारको समेत अभिनय रहेको छ । चलचित्रलाई नेपाल, अमेरीका लगायतका देशमा छयाङ्कन गरिएको छ ।
Post Views: 5