विराटनगर / नेपाली कांग्रेसले विराटनगरको मेयरमा नागेश कोइरालालाई उम्मेदवार बनाएको छ । कोइराला पाँच दलीय गठबन्धनबाट मेयरको उम्मेदवार भएका हुन् । गठबन्धनअनुसार उपमेयरमा जसपाले उम्मेदवार बनाउनेछ ।
तरुण दल हुँदै पार्टीको राजनीतिमा लागेका कोइराला यसअघिको निर्वाचनमा पनि मेयरको आकांक्षी थिए । कोइराला नेपाल तरुण दल मोरङका सभापति, नेपाली कांग्रेसको कोषाध्यक्ष, सचिव हुँदै हाल उपसभापतिको जिम्मेवारीमा छन् । नेपाली कांग्रेस विराटनगर महानगर समितिले कोइरालासहित महानगर सभापति दीपक चापागाईं, इन्दिरा कार्की, अमृत अर्याल, डा. डिला संग्रौला, भीम पराजुलीको नाम सिफारिस गरेको थियो । टिकट वितरणका क्रममा कोइराला र हालका मेयर पराजुलीमध्ये कसलाई दिने भनेर शीर्ष नेतृत्वमा विवादसमेत भएको थियो । तर, हालका मेयर पराजुलीले जनआकांक्षा र पार्टीको घोषणापत्रअनुसार काम गर्न नसकेका कारण टिकट दिन नहुने पक्षमा शीर्ष नेता नै सहमत भएका थिए । पराजुलीले अवसर पाएर पनि कांग्रेसको शिर ठाडो पार्ने गरी काम गर्न नसकेको भनेर छलफलमै कुरा उठेपछि कृष्ण सिटौलाबाहेक कसैले पनि उनलाई टिकट दिनुपर्छ भनेर आवाज नउठाएको स्रोतको भनाइ छ । त्यसपछि कोइराला र केन्द्रीय सदस्य अर्यालमध्ये कसलाई टिकट दिने भन्ने विषयमा पनि छलफल भएको थियो । अर्याल २०५४ कै निर्वाचनमा पराजित भएको र धेरै लामो समयपछि फेरि सोही पदमा उठ्दा जनताले नपत्याउने भन्दै कोइरालालाई नै टिकट दिन शीर्ष नेताहरु सहमत भएको स्रोतले बतायो । आगामी निर्वाचनमा क्षेत्र नम्बर ५ वा अन्य कुनै क्षेत्रमा सांसद बनाउने गरी अर्याललाई मनाइएको बताइएको छ । पार्टीका विभिन्न पदमा बसेर काम गरेको र समाजसेवामा पनि उत्तिकै सक्रिय भएका कारण नागेशलाई टिकट दिँदा जनतामा पनि उत्साह थपिने भन्दै अधिकांश शीर्ष नेताले नागेशको पक्षमा कुरा गरेका थिए ।
काठमाडौंमा रहेका कोइरालाले भने, “तपाईंहरु सबैको शुभेच्छाले मैले टिकट पाएँ । अब राजनीतिमार्फत जनताको सेवा कसरी गर्नुपर्छ भन्ने कुरा म देखाउनेछु । अहिले धेरै बोल्दिन ।”