विराटनगर, १९ फागुन । मोरङको बुढीगंगा र ग्रामथान गाउँपालिका जोड्ने सिंघिया खोलाको पुल लामो समय देखि अलपत्र बनेको छ ।

पुल निर्माण गर्न थालेको लगभग दुई दशक पुगिसकेको छ । तर ठेकेदारको लापरवाहीका कारण पुलले पुर्णता नपाउँदा स्थानियले दुःख भोग्न बाध्य छन् । खोला वारीपारीका स्थानियलाई सवारी साधनमा आवतजावत गर्न झनै समस्या भएको छ ।

पुल निर्माण नभएका कारण सवारीसाधनबाट आवतजावत गर्न २० किलोमिटरको घुमाउरो बाटो हिड्न बाध्य भएको स्थानियको गुनासो छ । झण्डै दुई दशक अगाडी विजय कुमार गच्छदारले पुलको सिलान्यास गरेका थिए । तर लामो समयमा पुलको तीन ओटा पिल्लर मात्रै उठाएर अलपत्र छाडेर ठेकेदार बेखबर भएको स्थानियको भनाई छ ।

पिलर उठाएको लामो समयसम्म पुल निर्माण हुन नसकेपछि मानिस आवतजावत गर्न पिलरसँगै जोडेर फलामको पुल निर्माण भएको छ । निर्माण शुरु गरिएको पुललाई स्थगित गरेर त्यसकै छेउमा अर्काे पुल निर्माणको प्रक्रिया शुरु भएको स्थानियको भनाई छ । तर त्यो पनि कहिले बन्ला भन्ने यकिन छैन् ।

हिउँदको समयमा जसोतसो आवतजावत गरेपनि बर्खाको समयमा समस्या हुने स्थानिय दिलिप कर्णले बताए । पुल बनेको खण्डमा बुढीगंगा र ग्रामथानका स्थानियलाई धेरै सहज हुने उनको भनाई छ । हिउँदको समयमा जसोतसो आवतजावत भएपनि बर्खायाममा लामो बाटो घुम्न बाध्य हुनुपर्ने कर्णले बताए ।

उनले भने, ‘बर्खाको समयमा विद्यार्थीलाई थप समस्या हुनेगरेको छ ।’ बर्खामा आवतजावत नै ठप्प हुने उनको भनाई छ । सरकारी पक्षकै लापरवाहीका कारण पुल अलपत्र भएको उनले बताए ।

सवारी साधन आवतजावत गर्न सक्ने अवस्था नभएपछि निक्कै समस्या भोग्न बाध्य भएको अर्का स्थानिय पवन कुमार कलवारले बताए । बर्खाको समयमा फलामे पुल समेत ढुब्ने गरेको उनको भनाई छ । पुल निर्माण भएको खण्डमा २० मिनेटमा पुग्ने स्थानमा पनि पुल नबन्दा एक घण्टा भन्दा बढी लाग्ने गरेको उनको भनाई छ ।